كل مامر طيفك يالمليح البشوش
هلت العين ماها والفؤاد ارتعش
كن صبري وفرقاكم وشوقي وحوش
تنهش الجسم مني ضاريات الوحش
الغلا طير يبني في الضماير عشوش
وانت طيرك غدى بالقلب يوم(ن) هبش
والمسامع عن العذال فيكم طروش
لو يقول الدخاتر مابلاها طرش
الحلا والملاحة ما تجي بالقروش
وان بغيت الدلايل في وجيه الغبش
أسمر اللون ترف الكف زاهي النقوش
يسلم النقش والمنقوش واللي نقش
شمس خدك وعينك في ظلال الرموش
بينها شرعبي(ن) من رآها ارتبش
ثغرها لي تبسم للنواظر يحوش
جعل ثغرك حبيبي ما يجيه العطش
باهيه ما تغطي عيبها بالرتوش
لا ولا صاب جذاب المحيا نمش
لو تجلت تزلزل راسيات العروش
الحذر يالولايف من يشوفه بلش
طارشي فوق طير ما يمل الطروش
راكبه لي تمكن في سماه انتعش
حث سيره ومن تحته غمام(ن) يغوش
صوب خل(ن) ملكني في مغيب النعش
بلغ اللي غرامه بالمحبه ينوش
كل ما مر طيفك يالمليح ابتلش
حرف الشيــن
|