لعيون ساره كتبت احلى المواويل
وغنيتها فدوة(ن)لعيـون سـاره
عيونها كنهـا مهـدودة الحيـل
مايناسب لوصفهـا الا هالعبـاره
نعسانة(ن)دوبها ماهوب بالحيـل
تسرق من النوم لكن في شطـاره
اي والله اني حسدت الكحل والميل
لمصافـح اهدابهـا تاره..وتـاره
تبعث من عيونها لقلبي مراسيـل
لين انها احتلت القلـب بجـداره
غدى لها قلبي اوطـان ومداهيـل
الحالهـا مالهـا ضـره..وجـاره
الله عطاها الجمال بدون تجميـل
من كل زين الله اعطاها اخيـاره
نهارها اجمل نهار وليلهـا ليـل
لياتفـرق سـواده عـن نهـاره
ماتحصي اوصافها كثر الاقاويـل
لكن قل الحـر تكفيـه الاشـاره
في داخلي للغـلا حفـل وقناديـل
وناس(ن)تعانق بعضها في حراره
ألذ مابالهوى عنـاد المواصيـل
والركض بين الحلاوه..والمـراره
كل التعب..لو منه ماجا محاصيـل
لخاطر عيونهـا ماهـو خسـاره