[center]السلام عليكم ورحمة الله وبركاته
يسعد جميع أوقاتكم
تحيه طيبه للجميع
قصيدهـ للشاعر الكبير سعد ابن فضيل السليمي الحربي مهداهـ
للرجل الشهم رجل المواقف والحميه الشاعر عمر بن عقيل
الجليدي الحربي وأبو فيصل يستحق الاشاده ويزهاهـ المدح
شهادة حق اقولها من باب الوفا لمن يستحق الوفا ...
يافهد خط ابـوك ملـزوم تقـراه
وليا قريتـه ترسلـه بالبريـدي
أبيات مني لأبوفيصــل معنـاه
بنات فكري من نـوادر قصيـدي
نقوة جواهر من جواهر مصفـاه
أخر طراز مسجله مـن جديـدي
نظمتهـا مـن مخـزنٍ ماقفلنـاه
وصرفت عمله سوقها من رصيدي
عداد مارش المطر وانتثـر مـاه
وماهزت الارياح خضر الجريـدي
سلام للي تفعـل الطيـب يمنـاه
طيب وطيبه كل ساعـه يزيـدي
حراً قطامي راس عيطـا تعـلاه
وأن هده الصقار كفـه يصيـدي
أبن الرجال اللي حميـده مزايـاه
أشيد به والناس مثلـي تشيـدي
أن قيل منهو قلت نعمن بطريـاه
عمر عسى عمره طويل ومديـدي
من روس قومن بالمكارم مسمـاه
قبيلة من حرب وأصلـه جليـدي
يعيش راس اللي على الطيب رباه
عقيل طيبه من جـدود الحفيـدي
أسمه على القرطاس كامل كتبناه
ولي الشرف يوم اكتبه في نشيدي
ربعه هل البلها هل العز والجـاه
قولن عليه شهود والله شهيـدي
جلاديـه يـوم النقـا والمثـاراه
عون الضعيف وكيد راس العنيدي
بالمعركه كم الحقوا مـن مخـلاه
وكم نزلوا من سرج شقرا عقيدي
على الشجاعه بالحرايب مضـراه
سباع نجد قلوبها مـن حديـدي
كلن يخضب باحمر الـدم شلفـاه
لياضرب تيـار حبـل الوريـدي
كلن على سلم العرب قـام مبنـاه
مشيدن بيته تقـل جـال حيـدي
الهيل والبـن اليمانـي تقهـواه
بدلال مجذيـات جنـب الوقيـدي
للضيف تذبح طيب الحشو والشاه
محافلـن تقـول بيـام عـيـدي
وخويهم والجـار يكـرُم ملحـاه
من بينهم مرتاح بالـه سعيـدي
وباق القبايل طيبهـم ماتخطـاه
ولاقول بحقوق القبايـل جحيـدي
والله ينصر من شمل دارنا حمـاه
اللي لحكمه كل طاغـي يهيـدي
مليكنا صقـر العـرب لاعدمنـاه
عند الدول رايه حكيـم وسديـدي
وارجع على موضوع خطن بعثناه
عن طير شلوى خاطري مايحيدي
يوم أمدحه ماقصدي المال والجاه
العز مالـي والقناعـه رصيـدي
05-31-2010, 12:23 AM
قصيدة مهداه للشاعر عمر الجليدي !!!
العرض الشجري